Дүние
Қырғыз билігі уран мен торий өндірісіне тыйым салды
Қырғызстан президенті Сооронбай Жээнбеков ел аумағында уран мен торий өндірісіне тыйым салатын заңға қол қойды. Бұл туралы президенттің баспасөз қызметі хабарлады.
Алматы, NEGE. Бұған қоса Қырғызстан аумағына уран мен торий шикізаты мен қалдықтарын кіргізуге заңмен тыйым салынды. Заң жобасын депутаттар тобы дайындады. 2019 жылы сәуір айында Қырғызстанда Ыстықкөл облысы аумағындағы Кызыл-Омпол уран кенін өндіру жоспару туралы жаңалық естіген жергілікті тұрғындар наразылыққа шықты. Белсенділер петиция әзірлеп, Бішкекте, Балыкчиде, Каракөлде және кеннің өзінде митинг өткізді.
Соған байланысты үкімет 22 сәуірде Кызыл-Омпол кеніндегі өндірісті тоқтатуға мәжбүр болды. 25 сәуірде кендегі жұмыс толық тоқтады. Өндіріске 2010 жылы рұқсат алған «ЮрАзия в Кыргызстане» компаниясы уранды қауіпсіз жолмен өндіргісі келетінін, ол үшін 271 млн сом жұмсағанын мәлімдеді.
2 мамырда Жогорку Кенеш Қырғызстанда уран кендерін өндіруге тыйым салатын қаулы қабылдады. Қырғыз президенті Сооронбай Жээнбековтің бұл мәселеге қатысты ұстанымы 4 мамырда жарияланды. Ол: «Қырғызстанда уран өндірілмейді» деп мәлімдеді.