Kinopark желісі отандық фильмдерден жарнама үшін заңсыз ақша алған
Алматыда Kinopark – Kinoplexx Theatres кинотеатрлар желісінің әрекеттерінен үстем жағдайды асыра пайдалану белгілері анықталды.
Астана, NEGE. Бұл жөнінде Бәсекелестікті қорғау және дамыту агенттігі хабарлады.
Агенттіктің Алматы қаласы бойынша департаменті өкілдерінің анықтауынша, желі отандық киноөндірушілерге жарнама бюджетiн төлеуді міндеттеген. Төлем жасалмаған жағдайда фильмдер көрсетілімге жіберілмеген. Бұл талаптар бәсекелестікті шектеп, нарыққа кіруге кедергі келтірген.
«Осыған байланысты Kinopark – Kinoplexx Theatres компаниясына бәсекелестікті қорғау саласындағы заңнаманы бұзу белгілерінің бар екендігі туралы хабарлама жолданды. Хабарламаны қарау нәтижесінде анықталған құқықбұзушылықтар жойылды», – делінген БҚДА хабарламасында.
Қазіргі уақытта прокатқа қатысты ашық және бірыңғай регламент әзірленіп жатыр.
