Қылмыс әлемінің серкесі «Серік голова» қайтыс болды
Петропавл қаласындағы ҚАЖД басқармасының №66 мекемесінде жазасын өтеп жатқан «Серік голова» лақап атымен танылған Серік Жаманаев қатерлі ісік ауруынан қайтыс болды.
Алматы, NEGE. Солтүстік Қазақстан облысы бойынша Қылмыстық-атқару жүйесі департаментінің мәліметінше, сотталған Жаманаев 2024 жылдың желтоқсан айында түзеу мекемесіне ауыстырылған.
- Тақырыпқа орай: «Серік Голова», «Леха Маймыш», «Дикий Арман»... Журналист өлімінің құпиясы қалай ашылды?
«Ол келген соң бірден толық медициналық тексеруден өтті. Диагнозы: бауыр ісігі, үшінші саты. Осы кезден бастап ол үнемі дәрігерлердің бақылауында болды. Сотталушы бірнеше рет тексерілу және емделу үшін медициналық мекемелерге жеткізілді. 8 сәуірде ол көпсалалы онкологиялық ауруханаға жатқызылды. Қолданылған шараларға қарамастан ол 25 сәуірде қайтыс болды», – делінген хабарламада.
Жаманаев 2021 жылдың басында 19 жылға бас бостандығынан айырылған. Одан кейін Қылмыстық кодекстің 262-бабының 2-бөлігімен (Ұйымдасқан топты, қылмыстық ұйымды құру және басқару, сол сияқты оларға қатысу), Қылмыстық кодекстің 194-бабы 4-бөлігінің 1-тармағы бойынша (Қорқытып алу), Қылмыстық кодекстің 106-бабы (Денсаулыққа қасақана ауыр зиян келтiру) бойынша кінәлі деп танылды. Прокурордың айтуынша, оның қылмыстық тобының әрекеті абайсызда адам өліміне әкеп соққан.
- Тақырыпқа орай: «Серік Голова» 19 жылға сотталды
Сот үкіміне сәйкес, ол 14 жыл төтенше жағдайдағы қылмыстық-атқару жүйесі мекемелерінде, тағы бес жыл толық қауіпсіздік мекемелерінде жазасын өтеуі тиіс еді.
