Кезекті рет локдаун енгізіледі
Еуропа елдерінде коронавирус індетінің өршуіне байланысты карантин шектеулері қатаңдатылды.
Алматы, NEGE. Бельгия үкіметі жанындағы коронавирус пандемиясымен күрес жөніндегі консультативті комитеттің кезекті отырысы өтті.
Бельгия Премьер-Министрі Александр Де Кроо мәлім еткендей, ел үкіметі «пасхалық үзіліс» жариялайды. Яғни алдағы төрт аптада, соның ішінде христиандық мереке күндері карантин талаптары күшейтіледі.
«Соңғы күндері вирус бізді жерге қайтарды. Бұл – саясаткерлер, сарапшылар және баршамыз үшін бойсұну сабағы», - деді ел премьер-министрі.
Бельгияда коронавирус жұқтырғандар мен ауруханаға жатқызылғандар статистикасы көңіл көншітерлік емес.
«Біз індетті бірнеше ай бойы ұстап тұра алдық. Бұл – үшінші толқынды да еңсере аламыз», - деді Де Кроо.
Ел үкіметі халықты вакциналаудан кейін ахуал жақсаратынына үмітті. Де Крооның айтуынша, мамыр айының соңында 65 жастан асқан тұлғалар мен қауіп тобындағы науқастардың барлығы вакцинаның бірінші препаратын алуы тиіс.
Елде кезекті локдаун 27 наурыздан бастап енгізіледі. Бельгияда сағат 22.00 – 06.00 аралығында комендаттық сағат өз күшінде қалады.
Сондай-ақ мемлекет тұрғындарының шетелге «маңызды емес сапарларына» шектеу бар. Шекараларда күшейтілген бақылау жүргізілуде.
Байланысқа түсумен жүргізілетін мамандықтардың жұмысы уақытша тоқтатылады. Мекемелердің денінде онлайн жұмыс режимі сақталады.
