Кентаудағы кафеде жаппай улану дерегіне қатысты қылмыстық іс қозғалды
Түркістан облысындағы Кентау қаласында орын тепкен кафеден жаппай улану оқиғасына қатысты қылмыстық іс қозғалды. Бұл туралы ІІМ мәлімдеді, деп хабарлайды ҚазАқпарат.
Астана, NEGE. Аталған жайт бірден ҚР ҚК-нің 304-бабы 1-бөлігімен «Санитариялық қағидаларды немесе гигиеналық нормативтерді бұзу» бойынша тіркеліп, қылмыстық іс қозғалған.
«Тәртіп сақшылары дәмхана қызметкерлерінен, оқиға куәгерлерінен жауаптар алып, сұрастыру жұмыстарын жан-жақты жүргізуде. Санитарлық-эпидемиологиялық бақылау басқармасының зертхана қызметкерлерімен сараптама жүргізу үшін жұмыстар атқарылуда. Дәмхананың барлық тағам түрлері алынып, зерттеуге жіберілді. Аталмыш тамақтану орнындағы қызметкерлердің бірқатарында медициналық кітапша болмай шықты», - деп жазды ведомство.
Қазіргі уақытта белгілі болғаны, Кентау мен Түркістан қаласының ауруханаларында 98 тұрғын, ал үй жағдайында 70 тұрғын ем қабылдауда. Полицейлер сотқа дейінгі тергеу амалдарын жүргізіп жатыр.