«Қазселденқорғау» үш облыста сел жүруі мүмкін екенін ескертті
3-5 шілде аралығында Алматы, Жамбыл және Жетісу облыстарының таулы және тау бөктеріндегі аудандарында көшкін және сел жүруі ықтимал.
Астана, NEGE. Бұл жөнінде Төтенше жағдайлар министрлігінің «Қазселденқорғау» мекемесі ескертті.
«Жоғары ауа температурасы мен нөсер жаңбыр болжамына байланысты өзендерде су деңгейінің көтерілуі және қарқынды беткей ағындары, су тасқынының қалыптасуы, ойпаң жерлерді су басу қаупі күтіледі. Сондай-ақ сырғыма және сел құбылыстары болуы мүмкін», – делінген хабарламада.
Құтқарушылар үш облыстың тұрғындары мен қонақтарынан сақтық шараларын сақтауды, әзірге таулы аймақтарға барудан бас тартуды сұрайды.
Еске салсақ, 2 шілдеде Алматы облысы Қарасай ауданындағы Ақсай өзенінің жағалауын су шайып, аумақтағы карьердің солтүстік-батыс бөлігінде топырақтың көшуіне байланысты жергілікті деңгейдегі төтенше жағдай жарияланды. Қауіпсіздік мақсатында жақын маңдағы 9 жеке тұрғын үйдің тұрғындары уақытша қауіпсіз жерге көшірілді.
