«Қазмырыш» зауытындағы жарылыс себебін анықтауға ЖОО ғалымдары тартылған
«Қазмырыш» кәсіпорны аумағында адамдардың қаза болуына әкеп соқтырған жарылыстың себептерін тексеруге университет ғалымдары тартылды.
Астана, NEGE. Бұл жөнінде Еңбек және халықты әлеуметтік қорғау бірінші вице-министрі Ербол Тұяқбаев мәлімдеді.
Оның айтуынша, мамандар оқиғаның мән-жайы мен жарылыстың қалай болғанын анықтауға көмектеседі.
«Біз бұл мәселеге жан-жақты қарадық. Жарылыстың нақты қалай болғанын түсіну үшін университет ғалымдарын шақырдық», – деді Ербол Тұяқбаев кулуарда.
Вице-министр тергеу маусым айында аяқталатынын, оның нәтижелері бұқаралық ақпарат құралдарында жарияланатынын айтып өтті.
Еске салсақ, 5 мамыр күні Өскеменде «Қазмырыш» зауыты аумағында жарылыс болды. Төтенше жағдайлар министрлігінің мәлімдеуінше, зауыт аумағында шаң ұстау құрылғысында газ-ауа қоспасы жарылып, оның соңы өрт пен нысанның ішінара опырылуына ұласқан.
Оқиға орнында екі адам қаза тауып, бірнеше азамат ауруханаға жеткізілгені хабарланды. Ауыр жарақат алған бір ер адам 11 мамырда ауруханада қайтыс болды.
Шығыс Қазақстан облыстық полиция департаменті еңбекті қорғау ережелерін бұзу фактісі бойынша қылмыстық іс қозғады.