Казинодан тапқан ақшасын дәретханаға ағызып жіберді
Шымкент тұрғыны пәтер жалдап, жасырын казино ашқан.
Алматы, NEGE. Құқыққорғаушылар пәтерді тінту үшін келгенде әйел ақшасын дәретханаға ағызып жіберген. Шұғыл әрекет ету арнайы отряды және қаржы комитетінің қызметкерлері заңсыз мекемеге кіргенде 300 мың теңгеге жуық ақшасын ұтылған жеті қонақты анықтайды. Өзбекстаннан келген 30 жастағы бизнесвумен бұл ақшаның бәрін кәрізге ағызған.
Екі баланың анасы жалға алған пәтерін кәдімгі казинодан кем етпей: қалың перде, еменнен жасалған үстел және покер ойынана қажет барлық аксессуармен жабдықтаған. Тіпті бейнебақылау камерасын да қойған. Енді әйел 500 мыңға жуық айыппұл төлеуі керек.
«Ұстаған кезде сотталған азаматпен бірге тағы ойнап отырған жеті адам және екі дилер қыз болды. Бәрі істе куәгер ретінде қарастырылды. Әйел дилерлерді 5 мың теңгеге жалдаған. Олар қылмыс бизнес екенін білмегенін айтты. Ал ұстау кезінде табысының бәрін дәретханадан ағызып жіберген. Олар іске өкінгенін айтқаннан кейін кешірілді», – деді судья Қанат Мылтықбаев.