«Қазатомөнеркәсіптің» табысы екі есе азайды
«Қазатомөнеркәсіп» ҰАК» АҚ 2025 жылдың қаңтар-маусым айларындағы таза табысының екі есе азайғанын хабарлады. Аталған мерзімдегі көрсеткіш 263,2 млрд теңге болған, ал бір жыл бұрын 571,7 млрд теңге болатын.
Алматы, NEGE. Мұның жайын компания түсіндірді. Айталық, 2024 жылдың алғашқы жартыжылдығында көрсеткіш жоғары болғаны «Буденовское» БК ЖШС-ін біріктіруден түскен бір реттік табысқа байланысты екен. 2025 жылы түзетілген пайдаға қосымша түрде валюталық айырмадан болған шығын да әсер еткен.
Есепті кезеңде топтың кірісі 6%-ға азайып, 660,2 млрд теңге болған. Соған қарамастан, жалпы пайда 11%-ға өсіп, 286,5 млрд теңгеге жетті. Салық салынғанға дейінгі пайда 1,7 есеге құлдырап, 322,6 млрд теңгені құрады.
Жыл басынан бері компания активтері 6,6%-ға өсіп, 4,073 трлн теңгеге жетті. Міндеттемелер бір жарым есеге артып, 1,241 трлн теңгені құрады. Ал меншікті капитал 5,5%-ға қысқарып, 2,831 трлн теңгеге дейін төмендеді. Жарғылық капитал өзгеріссіз қалды, көлемі – 37,051 млрд теңге.
