Қазан айында ауаның орташа температурасы нормадан 1–2°С жоғары болады деп болжанды
«Қазгидромет» мамандары қазан айына арналған ауа райының консультативтік болжамын ұсынды.
Астана, NEGE. Болжамға сәйкес, күздің екінші айында ауаның орташа температурасы республиканың басым бөлігінде климаттық нормадан 1-2°С жоғары, ал Шығыс Қазақстан облысында, Павлодар облысының солтүстік-шығыс жартысында және Абай облысында норма шамасында күтіледі.
«Қазақстанның басым бөлігінде ауаның орташа айлық температурасы +3…+10°С, республиканың оңтүстік жартысында +11…+16°С аралығында күтіледі», – делінген болжамда.
Ал жауын-шашын мөлшері республиканың басым бөлігінде норма шамасында болады деп болжанғанымен, Батыс Қазақстан облысының басым бөлігінде, Атырау облысының батысында, Маңғыстау облысының батысында, Ақтөбе облысының солтүстігінде, Қостанай облысының солтүстік-батысында нормадан жоғары жауын-шашын күтіледі.
Ал Жамбыл, Жетісу облыстары мен Қызылорда облысының оңтүстік-шығысында, Ұлытау облысында, Қарағанды облысының оңтүстігінде, Абай облысында, Түркістан облысының солтүстігі мен Алматы облыстарында жауын-шашын мөлшері нормадан аз болады деп болжанады.