«Қазақтың Робин Гуды» атанған блогердің соты кейінге шегерілді

Алматы, NEGE. Сот хатшысының хабарлауынша, басты айыпталушы Ілияс Сариев ауырып қалған, сол себепті процесс кейінге шегерілді.

Өткен сот отырысында судья Ернар Қасымбековтің қаулысымен сот тергеуі қайта жанданатыны хабарланған еді. Бұған айыптау актісін зерделеу барысында қосымша сұрақтардың туындағаны себеп болған. Сонымен қатар, прокурордың айыптау актісінде жәбірленушілердің сотталушыларға ақша аударған уақыты нақты көрсетілмеген. Соған байланысты судья прокурорға жаңартылған айыптау актісін ұсынуды тапсырған.  

Бүгін Сариевпен бірге жұмыс істеген мобилографтар мен «MM Travel» туристік компаниясының менеджерлері куәгер ретінде сотқа шақырылған еді.

Естеріңізге сала кетейік, Ілияс Сариев пен Ақтоты Дүйсееваға ҚР Қылмыстық кодексінің 190-бабының 3-бөлігі 4-тармағы «Аса ірі мөлшерде бірнеше рет жасалған алаяқтық» бойынша айып тағылып отыр. Іс бойынша барлығы 26 жәбірленуші бар. Сариевке 6 эпизод бойынша айып тағылса, Дүйсееваның үстінен 20 эпизод бойынша іс қозғалған.