Қазақстанның 5 облысында бұрқасын тұруы ықтимал
Қазгидромет жақын күндері Қазақстанның 5 өңірінде дауыл тұруы мүмкін деп ескертуде.
Алматы, NEGE. Синоптиктер 27-қаңтарда Солтүстік Қазақстан облысында қар жауып, боран соғады деп болжайды. Жолда көктайғақ болып, кей жерде желдің екпіні секундына 23-28 метрге дейін жетуі мүмкін. Петропавлда 27 қаңтарда қар жауып, қарлы бұрқасын тұрады деп болжаған мамандар көшеде көктайғақтан абай болуды ескертеді.
Дүйсенбіде Қостанай облысында да күн райы бұзылып, дауыл тұрады деген болжам бар. Батыстан соққан желдің күші кей жерде секундына 23-28 метрге жетуі ықтимал.
27-қаңтарда Шығыс Қазақстан облысының көп бөлігін тұман басады, қар жауады және боран соғады. 27-қаңтарда Өскеменде қарлы бұрқасын болады деген болжам бар.
Қызылорда облысының тұрғындарына да абай болған жөн. Жолда көктайғақ, ал кей жерде желдің екпіні секундына 23 метрге дейін жетпек. Мамандар боран тұру ықтималдығын 95-100 пайызға дейін сеніммен айтуда.
27-қаңтарда Маңғыстау облысында да жел күшейеді. Ақтауда да бұрқасын болып, күн күрт суытады деген ақпар бар.
