Қазақстанның үш қаласында ауаның сапасы нашарлауы мүмкін
31 мамыр күні Қазақстанның көп бөлігінде ауа райы қолайлы болады. Дегенмен, кейбір қалаларда ауа сапасының нашарлауы ықтимал, деп хабарлайды «Қазгидромет» РМК.
АЛМАТЫ, NEGE. Синоптиктердің мәліметінше, Ақтөбе қаласында, сондай-ақ түнгі уақытта Қостанай мен Астанада атмосфералық ауаның ластануына қолайсыз метеожағдайлар күтіледі.
Ауаның ластануына ықпал ететін қолайсыз метеожағдайлар (ҚМЖ) – бұл қысқа мерзімді метеорологиялық факторлардың (тыныш ауа райы, әлсіз жел, тұман, инверсия) үйлесімі. Мұндай жағдайда зиянды заттар жерге жақын атмосфералық қабатта жиналып, ауаның сапасын төмендетуі мүмкін.
Мамандардың айтуынша, ауа сапасының өзгеруіне әсер ететін басты факторлардың бірі – синоптикалық жағдай: желдің күші мен бағыты, жауын-шашын, ылғалдылық және ауа температурасы.
Айта кетейік, бұған дейін 31 мамыр күні Қазақстанның 16 өңірінде және Астанада аптап ыстық пен найзағай күтілетіні хабарланған болатын.
