Қазақстанның телефон коды ауыспайды: Ресей мен Қазақстан +7 кодын бірге қолдану туралы келісімге келді
Бұл туралы Цифрлық даму, инновация және аэроғарыш өнеркәсібі министрлігі хабарлады.
Алматы, NEGE. «Бүгінгі таңда Қазақстан Республикасы Үкіметінің 2024 жылғы 26 қазандағы №891 «Қазақстан Республикасы Үкіметі мен Ресей Федерациясы Үкіметі арасындағы әлемдік нөмірлеудің 7-ші аймағын бірлесіп пайдалану туралы келісімге қол қою туралы» Қаулысына қол қойылды», - делінген хабарламада.
Қазақстан Республикасының Цифрлық даму, инновациялар және аэроғарыш өнеркәсібі министрлігі Ресей Федерациясының байланыс әкімшілігімен келіссөздер жүргізіп, келесі мәселелер бойынша келісімге қол жеткізген:
1) «+7» кодын бірлесіп пайдалану;
2) тараптардың бірінің басқа нөмірлік кодқа көшу мерзімі 6 айдан 2 жылға дейін ұзартылды (ХЭО ұсынымдарына сәйкес);
3) Қазақстан Республикасының нөмірлік қоры 000-099 диапазонында DEF-кодын қосу арқылы кеңейтіледі.
Жақын арада Қазақстан Республикасы мен Ресей Федерациясы арасында Келісімге қол қою жұмыстары жүргізіледі.