Қазақстанның сыртқы қарызы 182,8 млрд долларға жетті
Ұлттық банк мәліметінше, Қазақстанның сыртқы борышы жыл басынан бері 0,9 млрд долларға ұлғайып, 182,8 млрд долларды құрады.
Астана, NEGE. Банк өкілдерінің түсіндіруінше, сыртқы борыш бағаның және басқа өзгерістердің әсерінен өскен. Бұл ретте өтеу мерзімі бойынша сыртқы қарыздың 87,1%-ы ұзақ мерзімді қарыз екені айтылды.
«Бұл бір жағынан, өтімділік тәуекелдерін азайтады, ал екінші жағынан, жалпы нарықтық талаптар өзгеруінің борышты өтеуге және оған қызмет көрсетуге әсерін күшейтеді», – делінген ресми ақпаратта.
Сыртқы қарыздың 69,2%-ы бейрезиденттерден тартылған қарыздар мен кредиттер болса, 13,0%-ы бейрезиденттердің иелігіндегі борыштық бағалы қағаздар екені мәлім болды.
Еске салсақ, 29 маусымда сенаторлар Халықаралық қайта құру және даму банкінен және Азия инфрақұрылымдық инвестициялар банкінен қарыз алуға қатысты құжатты ратификациялаған болатын. Құжатқа сәйкес, Халықаралық қайта құру және даму банкінен 92,3 млрд жапон йені, ал Азия инфрақұрылымдық инвестициялар банкінен 62,3 млрд жапон йені көлемінде қарыз тартылмақ. Теңгемен есептегенде, қарыздың жалпы сомасы 460 млрд теңгеден асады.
