Қазақстаннан Қырғызстанға құны 37 млрд теңге болатын 190 мың тонна бензин заңсыз шығарылған
Қаржылық мониторинг агенттігі Ішкі істер министрлігі және Шекара қызметімен бірлесіп жанар-жағармайды ел аумағынан заңсыз шығарудың 712 жағдайының жолын кесті.
Астана, NEGE. ҚМА мәліметінше, бұл деректер бойынша 8 қылмыстық іс қозғалған.
Атап айтқанда, Маңғыстау облысында 28,5 мың тоннадан астам мұнайды заңсыз өңдеген шағын мұнай өңдеу зауытының қызметі тоқтатылды. Өндірілген өнім мазут ретінде рәсімделіп, шетелге шығарылған.
Сонымен қатар агенттік Қырғыз Республикасына АИ-92 маркалы бензинді заңсыз тасымалдаумен айналысқан қылмыстық топқа қатысты тергеудің аяқталғанын хабарлады. Заңсыз шығарылған жанармай көлемі 190 мың тоннадан асып, оның құны 37 млрд теңгеден асқан.
Сондай-ақ «Түрксіб» станциясында шамамен 500 тонна бензин тиелген 8 теміржол цистернасы анықталған. Құны 138 млн теңге болатын тәркіленген бензин мемлекет кірісіне айналдырылған.
Ал Түркістан облысында мемлекеттік шекара астынан арнайы қазылған тоннель арқылы Өзбекстан Республикасына бензин контрабандасын ұйымдастырған трансұлттық қылмыстық топтың заңсыз қызметі тоқтатылған. Бұл іс бойынша кінәлі тұлғалар ұзақ мерзімге бас бостандығынан айырылды.