Қазақстанда құжаттарды рәсімдеуге жасанды интеллект көмектесетін болады
Цифрлық даму, инновациялар және аэроғарыш өнеркәсібі министрі Бағдат Мусин министрлікте ChatGPT сияқты азаматтардың сұраныстарын жылдам және тиімді орындау үшін жасанды интеллект технологиясын енгізіп жатқанын айтты.
Алматы, NEGE. "Кейбір қызметтерді цифрлық форматта алу қиын. Мәселен, қазір әрбір қолданушы электронды қолтаңба алу, оны компьютерге орнату немесе парольді жоғалту сияқты кедергілерге тап болып жатады.
Сол себепті бірінші кезекте барлық салада қызметтерді смартфонға немесе проактивті форматқа көшіру, сұраныстарды тек биометрика немесе QR арқылы растау енгізіледі.
Екіншіден, біз ChatGPT сияқты жасанды интеллект технологиясын енгіземіз. Бұл азаматтардың құжаттарын тәулік бойы өңдеуге және барлық сұрақтары мен қызметтерге тікелей чатта жылдам жауап алуға мүмкіндік береді", - деді Бағдат Мусин.