Қазақстандықтарға «неке мерзімін ұзарту» туралы жалған хабарлама тарады
Әлеуметтік желілерде екінші деңгейлі банктердің қосымшалары арқылы «некені тіркеу мерзімін ұзарту қажет» деген ақпарат тарады. Әділет министрлігі бұл мәліметтің шындыққа жанаспайтынын және алаяқтық сипатта екенін ескертті.
Астана, NEGE. Министрліктің ресми өкілі Талғат Уәлидің мәліметінше, Қазақстанның неке-отбасы заңнамасында некенің жарамдылық мерзімі қарастырылмаған. Неке бір рет тіркеледі және оны кейін қайта тіркеу немесе мерзімін ұзарту қажет емес.
«Неке бір рет тіркеледі және оның шекті мерзімі белгіленбейді. Осыған байланысты некені ұзарту талап етілмейді», – деп түсіндірді Әділет министрлігі.
Фото: Әділет министрлігіНеке ерлі-зайыптылардың біреуінің немесе екеуінің өтініші бойынша бұзылған жағдайда, сондай-ақ заңнамада көзделген өзге де жағдайларда тоқтатылуы мүмкін. Некені бұзу тіркеуші орган арқылы немесе сот тәртібімен жүзеге асырылады.
Әділет министрлігі қазақстандықтарды мұндай хабарламалардағы күмәнді сілтемелерге өтпеуге және жеке деректерін бөгде адамдарға бермеуге шақырды. Ресми ақпаратты мемлекеттік органдардың ресми ресурстарынан тексерген жөн.