Қазақстандық оқушылар IEO-2024 халықаралық экономика олимпиадасында 5 медаль иеленді
Гонконгта IEO-2024 халықаралық экономика олимпиадасының жеңімпаздары мен жүлдегерлерін марапаттау рәсімі аяқталды. Оған әлемнің 53 елінен 250-ден астам оқушы қатысты.
Алматы, NEGE. Еліміздің намысын қорғаған бес қатысушының барлығы жүлдегер атанып, екі күміс және үш қола медаль жеңіп алды:
Күміс медаль – Айдархан Жұбатқан, Ақтөбе қаласының ФМБ НЗМ 11-сынып оқушысы;
Күміс медаль – Жәңгір Ильжанов, Алматы облысы «Дана» мектебінің 10-сынып оқушысы;
Қола медаль – Әлия Мұсаева, Алматы қаласы №165 мамандандырылған лицейінің 11-сынып оқушысы;
Қола медаль – Томирис Ыдырысбаева, Астана қаласының НЗМ 12-сынып оқушысы;
Қола медаль – Батырхан Мұхтархан, Қарағанды қаласының ХМБ НЗМ 9-сынып оқушысы.
Команда жетекшілері: Нұрсұлтан Нұрмұханов – Назарбаев Университетінің магистрі; Медет Жамбаев – «Дарын» РҒПО-ның педагогикалық шеберлік және психологиялық қызмет бөлімінің әдіскері.
Қазақстан командасы өткен жылмен салыстырғанда жалпы командалық есепте 10-нан жоғары сатыға көтеріліп, ең жоғары нәтижелерді көрсетті. Осылайша, біздің оқушылар әлемдегі ең мықты 10 команда және бизнес-кейс бойынша 7 команда қатарына кірді. Бұл нәтижеге ҚР Оқу-ағарту министрлігінің қолдауымен экономика бойынша олимпиадалық резерв арасында алғаш рет өткізілген іріктеу мен оқу-жаттығу жиындарының арқасында қол жеткізілді.