Қазақстандық банктер 21 жасқа дейінгі азаматтарға төлем картасын берудің шарттарын өзгертті
Қазақстан Республикасының Қаржы нарығын реттеу және дамыту агенттігінің жаңа қаулысына сәйкес, 18-21 жас аралығындағы қазақстандықтар төлем карталарын онлайн режимде рәсімдей алмайды. Құжат агенттіктің ресми сайтында жарияланды.
Алматы, NEGE. Енді бұл қызметті тек банк бөлімшесіне барып, орындай алады.
Төлем карталарын шығарумен қатар, банктерге 21 жасқа дейінгі жастармен «қашықтан іскерлік қатынастар орнатуға» да тыйым салынады.
Тағы бір өзгеріс 14 пен 18 жас аралығындағы қазақстандықтарға қатысты, енді кәмелекетке толмағандар банк қызметтерін онлайн пайдаланса, олардың операцияларын ата-аналары немесе басқа да заңды өкілдері міндетті түрде растауы қажет.
Агенттіктің мәліметінше, бұл шаралар клиенттерді алаяқтықтан қорғау мақсатында енгізілмек. Сонымен қатар агенттік банктерге клиенттермен қарым-қатынас аяқталғаннан кейін олардың биометриялық деректерін (фото және видео) кемінде бес жыл сақтауды міндеттейді.
Деректерді тиімді өңдеу және күмәнді операцияларды анықтау үшін банктер жасанды интеллект технологияларын қолдануға міндетті болады.