Қазақстандағы көмір қоры 300 жылға жетеді – Энергетика министрлігі
Қазақстандағы көмір қорының көлемі 33 млрд тоннадан асады. Бұл жөнінде энергетика министрі Ерлан Ақкенженов Үкімет отырысында мәлімдеді.
Астана, NEGE. Ақкенженовтің мәлімдеуінше, Қазақстан көмір кені бойынша әлемде 10-орында тұр, бұл қазіргі өндіру көлемін ескергенде 300 жылдан астам уақытқа жетеді.
«Ірі көмір кен орындары Орталық Қазақстанның екі негізгі аймағында орналасқан. Олар – Қарағанды көмір бассейні мен Торғай көмір бассейніндегі Шұбаркөл және Жалын кен орындары. Солтүстік-шығыс аймақта Екібастұз көмір бассейні, Майкүбі көмір бассейні, Қаражыра кен орны бар. Еліміздегі көмір қорының көлемі – 33,6 млрд тонна», – деді Ерлан Ақкенженов.
Министрдің айтуынша, 2025 жылдың қорытындысы бойынша шамамен 115,9 млн тонна көмір өндірілді, бұл 2024 жылмен салыстырғанда 7%-ға көп. Ал 2026 жылы елімізде көмір өндіру көлемі 128,9 млн тонна болады деп жоспарланып отыр.
«Өндірілетін көмірдің негізгі бөлігі ішкі нарыққа жіберіледі, ол электр энергетикасында, коммуналдық-тұрмыстық секторда және өнеркәсіпте қолданылады. Көмір экспортының да деңгейі сақталып отыр», – деді энергетика министрі.
Сондай-ақ, сала басшысы көмір өнеркәсібінде 32 мыңға жуық адам жұмыспен қамтылғанын атап өтті.