Қазақстанда заңсыз байығандарға жауапкершілік енгізілмек
2020 жылы тіркелген сыбайлас жемқорлық қылмыстарының саны 5 пайызға азайды. Бұл туралы ҚР Сыбайлас жемқорлыққа қарсы іс-қимыл агенттігінің төрағасы Алик Шпекбаев айтты.
Алматы, NEGE. «Жүйелі алдын алу жұмыстарының арқасында 2020 жылы тіркелген сыбайлас жемқорлық қылмыстарының саны 5 пайызға азайды. 2017 жылдан бастап 2020 жылға дейінгі кезеңде тіркеу тіпті 11 пайызға қысқарғанын атап өткен жөн. Бұл сыбайлас жемқорлық қылмыстар санының тұрақты төмендеу үрдісін көрсетеді», - деді Алик Шпекбаев агенттіктің алқа отырысында.
Агенттік басшысының айтуынша, сыбайлас жемқорлыққа қарсы алғашқы үш топтаманың жалғасы ретінде жақын арада төртіншісі әзірленетін болады.
«Оның ішінде заңсыз баю үшін жауапкершілікті енгізу, сыбайлас жемқорлық фактілері туралы хабарлайтын адамдарды қорғаудың кешенді жүйесін қалыптастыру, integrity check кәсіби сатылмаушылығына тестілеуді енгізу, параны уәде еткені/ұсынғаны үшін қылмыстық жауапкершілікті енгізу және аса ауыр сыбайлас жемқорлық қылмыстары үшін бірнеше еселенген айыппұлдарды жою бар», - деді ол.