Қазақстанда Президенттік жастар кадр резервіне іріктеу басталады
Мемлекеттік қызмет істері агенттігінің төрағасы Дархан Жазықбаев ОКҚ алаңында Президенттік жастар кадр резервіне кезекті іріктеу туралы баяндады.
Алматы, NEGE. Биылғы іріктеудің ерекшелігі – іріктеу мемлекеттік аппараттың салалық кадрларға қажеттілігін ескере отырып жүргізіледі.
«Іріктеу 6 негізгі сала бойынша жүзеге асырылады: инфрақұрылымды, өнеркәсіпті дамыту және сауда саясаты; агроөнеркәсіптік кешен және қоршаған ортаны қорғау; сыртқы саясат және инвестициялар; экономикалық және қаржылық саясат; цифрландыру; әлеуметтік саясат және азаматтық қоғам. Үміткерлермен әңгімелесуді міндетті түрде салалық орталық органдар өкілдерінің қатысуымен өткізу тәжірибесі енгізілуде», - деді спикер баспасөз конференциясында.
Талаптарға сәйкес, іріктеуге жасы 35-тен аспаған, жоғары білімі және 5 жыл жалпы жұмыс тәжірибесі бар, мемлекеттік тілді В1 деңгейінен төмен емес меңгерген Қазақстан Республикасының азаматы қатыса алады.
Президенттік жастар кадр резервіне іріктеу қыркүйек - желтоқсан аралығында өтеді.