Аймақ
Қазақстанда өсірілетін қарақұмықтың жартысына жуығы Павлодар облысында егіледі
Павлодар облысында егіс алқаптары әртараптандырылып жатыр. Атап айтқанда, биыл онда күнбағыс пен қарақұмық отырғызылды. Қарақұмық дақылдары 42 мың гектарға себілген. Бұл Қазақстанда егілген қарақұмықтың 44% құрайды. Мұны Павлодар облысының әкімі Әбілқайыр Сқақов Орталық коммуникациялар қызметінде өткен баспасөз мәслихатында мәлімдеді.
– Биыл ауылшаруашылық дақылдары егілген алқап 6 пайызға өсіп, 1,5 миллион гектардан асты. Біз агроөнеркәсіптік кешеннің әлеуеті арқылы аймақтық экономиканы әртараптандыруды жалғастырамыз. 2025 жылға дейін осы бағыттағы инвестициялық пулға кіретін 46 жобаның құны 230 миллиард теңге. Оның жартысынан астамы биыл іске асырылады, – деді Ә.Сқақов облыстағы көктемгі жұмыстарының аяқталуы жөнінде.
Мәселен, биыл облыста алты сүт фермасын іске қосу жоспарланып, олар сүт өндірісін 19 мың тоннаға немесе 5% арттыруы тиіс.