Қазақстанда жалған диплом дайындаумен айналысқан 20 сайт анықталды

Астана, NEGE. Бұл туралы Ғылым және жоғары білім министрлігі хабарлады.

Дипломның түпнұсқалығын қайдан тексеруге болады?

Жұмыс берушілер дипломның түпнұсқа екенін https://epvo.kz сервисі арқылы тексере алады. Дипломның электрондық нұсқасы электрондық үкіметтің («Цифрлық құжаттар») мобильді қосымшасында да қолжетімді.

«Дипломдар арнайы модуль арқылы бірегей нөмірлер мен QR-кодтар беру жолымен қалыптастырылады. Жүйеге қол жеткізу құқығы осы модульде тіркелген, ресми түрде жауапты университет қызметкерлеріне ғана беріледі», – делінген министрлік хабарламасында.

Дипломдарды генерациялау «Жоғары білім берудің бірыңғай платформасы» (ЖББП) ақпараттық жүйесіндегі білім алушылар туралы деректер негізінде іске асырылады. Егер білім алушы туралы ақпарат ЖББП-да болмаса, диплом нөмірін беру мүмкін емес. Өзіндік үлгідегі білім туралы құжаттарда бірегей нөмір мен QR-код болмаған жағдайда мұндай құжаттар жарамсыз деп танылады.

Министрлік өкілдері жалған дипломдар жасау немесе пайдалану заңмен қатаң жазаланатынын ескертті. Қылмыстық кодекстің 385-бабына сәйкес жалған құжаттарды жасау немесе қолдану айыппұл салуға немесе екі жылға дейін бас бостандығын айыру жазасына әкеп соғуы мүмкін.