Қазақстанда тұрғын үйге сұраныс төмендегенімен, жаңа баспананың бағасы 14,6%-ға өскен
Шілде айында Қазақстанда жаңа тұрғын үйдің бір шаршы метрінің бағасы 14,6%-ға өсті. Жылдық мәнде жаңа баспана Астана, Алматы және Ақтөбе қалаларында қымбаттаған. Қайталама нарықта да баспана бағасы 9,5%-ға өскен.
Астана, NEGE. Бұл деректер Halyk Research шолуында келтірілген.
Шолуда тұрғын үй бағасы өскенімен, баспана нарығындағы белсенділік төмендегені атап өтіледі. Сарапшы Арслан Аронов келтірген дерекке сүйенсек, шілдеде Қазақстанда 37,2 мың сатып алу-сату мәмілесі тіркелген. Оның мәлімдеуінше, бұл маусыммен салыстырғанда 4,9%-ға, ал өткен жылдың шілдесімен салыстырғанда 6,5%-ға аз.
Жалдау ақысы да өсті. Шілдеде тұрғын үйді жалдау құны айлық мәнде 1,4%-ға, жылдық мәнде 14,2%-ға қымбаттаған. Астанада жалдау ақысы бір айда 2,7%-ға өскен. Ең жоғары жылдық өсім Павлодарда (+39,2%) және Петропавлда (+32,8%) тіркелген.
Сарапшылардың бағалауынша, алдағы уақытта тұрғын үй нарығына салық заңнамасындағы өзгерістер, БЖЗҚ-дағы зейнетақы жинақтарының ең төменгі жеткіліктілік шегін қайта қарау, жаңа Құрылыс кодексі және ипотекалық бағдарламалардың шарттары әсер етуі мүмкін.