Қазақстанда төрт коллекторлық агенттік жұмыс істеу құқығынан айырылды
Қаржы нарығын реттеу және дамыту агенттігі төрт коллекторлық агенттік тізілімнен шығарылғанын хабарлады.
Астана, NEGE. Атап айтқанда, Seven, iCollect, «Каз Инвест Коллекшн» және «Табыс» коллекторлық агенттіктері. ҚНРДА аталған коллекторлық агенттіктерді тексеру барысында борышкерлермен жұмыс істеу кезінде жүйелі түрде ереже бұзушылықтарға жол берілгенін анықтаған.
Осыған байланысты бұл ұйымдар коллекторлық қызметті жүзеге асыру құқығынан айырылды. Енді олар тізілімнен шығару туралы хабарламаны алған күннен бастап күнтізбелік 5 күн ішінде кредиторларды, борышкерлер мен сенімгерлік басқару шарттары жасалған тұлғаларды хабардар етуге тиіс. Сондай-ақ ұйымдар күнтізбелік 30 күн ішінде өз атауынан «коллекторлық агенттік» деген қызмет түрін білдіретін сөздерді алып тастау арқылы қайта тіркеу рәсімін жүргізуі керек.
«Бұл ретте коллекторлық агенттікті тізілімнен шығару борышкерлерді банктік қарыз шарттары немесе микрокредит беру туралы шарттар бойынша міндеттемелерді орындаудан босатпайды», – деп ескертеді ведомство өкілдері.
ҚНРДА қаржылық қызметтерді тұтынушылардың құқықтары мен заңды мүдделерін қорғау негізгі басымдықтардың бірі екенін атап өтіп, коллекторлық қызметтер нарығында заңсыз әрекеттерді анықтау және жолын кесу бойынша жүйелі шаралар қабылдайтынын ескертті.