Қазақстанда суррогат ана қызметіне кім тапсырыс бере алады: заңға өзгеріс енгізілді

Астана, NEGE. Мемлекет басшысы Қасым-Жомарт Тоқаев «Қазақстан Республикасының кейбір заңнамалық актілеріне мемлекеттік басқару және жергілікті өзін-өзі басқару мәселелері бойынша өзгерістер мен толықтырулар енгізу туралы» заңға қол қойды. Атап айтқанда, «Неке (ерлі-зайыптылық) және отбасы туралы» кодекс жаңа тармақпен толықтырылды.

Суррогат ана болу шартын жасасу кезінде Қазақстан Республикасының некеде тұрған (ерлі-зайыпты болған) азаматтары, ерлі-зайыптылар (тапсырыс берушілер) бірқатар талаптарды орындауға міндеттеледі. Соның ішінде:

• суррогат ананың медициналық тексеруден өтуіне байланысты шығындарды өтеуге;
• қосалқы репродуктивтік әдістер мен технологияларды қолдануға байланысты шығындарды өтеуге;
• қосалқы репродуктивтік әдістер мен технологияларды қолданатын медициналық ұйымдарға өздерінің дене және психикалық денсаулығы туралы медициналық қорытындыны, сондай-ақ медициналық-генетикалық тексеру нәтижелерін ұсынуға;
  • суррогат ананың жүктілік, босану кезеңіндегі және босанғаннан кейінгі 56 күн ішіндегі медициналық қызметтерге жұмсалған шығындарын төлеуге, ал жүктілік пен босануға байланысты асқынулар болған жағдайда босанғаннан кейінгі 70 күнге дейінгі медициналық шығындарды өтеуге міндетті.

Сонымен қатар заңмен жекелеген кіріс көздерін аудандық маңызы бар қалалар, ауылдар, кенттер және ауылдық округтер деңгейіне беру көзделген түзетулер енгізілді.

Сондай-ақ Қазақстан Республикасының азаматы мәслихат төрағасы болып қатарынан екі реттен артық сайлана алмайтыны туралы шектеу белгіленді.

Бұдан бөлек «Жергілікті өзін-өзі басқару туралы» заңға «Мәслихат аппараты басшысының құзыреті» деп аталатын жаңа бап және басқа да өзгерістер енгізілді.