Қазақстанда мемлекеттік мүлікті арзан бағаға сатуға тыйым салынды
Қазақстанда мемлекеттік мүлікті аукциондарда төмендетілген және тым арзан бағамен сату тәжірибесі ресми түрде жойылды.
Астана, NEGE. Бұрын заңда бағаны төмендететін аукциондарды өткізу кезінде ең төмен бағаға шектеу қойылмаған. Бұл мүлікті тым арзан бағаға сату қаупін туғызған.
«Жоғары аудиторлық палата жекешелендіру саласындағы мемлекеттік саясаттың тиімділігін тексеріп, тексеру қорытындысы бойынша Үкіметке заңнаманы өзгерту бойынша ұсынымдар берді. Нәтижесінде бұл норма заңнамамен бекітілді», – делінген хабарламада.
Енді сауда-саттық кезінде ең төменгі бағаны белгілеу арқылы мемлекет активтерін төмен бағамен сатуға жол берілмейді.
Сондай-ақ мемлекеттік мүлікті стратегиялық инвесторға тікелей сату тетігі жойылды. Мұндай тәртіп активтерді конкурс өткізбей сатуға жол ашып келген еді. Аудиторлардың ұсынысы бойынша бұл норма заңнамадан толығымен алып тасталды.
