Қазақстанда кей дәрінің бағасы 40 пайызға дейін төмендеген
Медициналық және фармацевтикалық бақылау комитеті әлеуметтік желілердегі дәрілік заттар бағасының жаппай өсуі туралы ақпаратты теріске шығарды.
Астана, NEGE. Керісінше, қазанда маусыммен салыстырғанда, дәрілердің 50%-ында бағаның төмендеуі тіркелген. Еліміздің 20 өңірінде жүргізілген мониторинг осындай қорытынды жасауға негіз болған.
Соның ішінде «Хеель», «Ревмоксикам», «Цефяпс», «ВАЛМАК-Н», «Зитмак» сияқты бес дәрінің бағасы 20 пайыздан 40 пайызға дейін айтарлықтай төмендеген.
Бұл ретте ведомство өкілдері бес мыңға жуық дәрілік затқа шекті баға бекітілгенін еске салып өтті.
«Медициналық және фармацевтикалық бақылау комитеті 2025 жылы елімізде дәрілік заттардың бағасын мемлекеттік реттеудің жаңартылған тетігі іске асырылып жатқанын хабарлайды.
Қазіргі уақытта 4994 сауда атауындағы дәрілік заттарға шекті бағалар бекітілген. Сонымен қатар 1707 рецептісіз босатылатын препарат мемлекеттік реттеуден шығарылып, уәкілетті органдардың тұрақты мониторингі жағдайында нарықтық бағамен сатылуда», – делінген хабарламада.
Белгіленген шекті бағаларды негізсіз көтеру фактілері анықталған жағдайда Қазақстан Республикасы Әкімшілік құқық бұзушылық туралы кодексінің 426-бабына сәйкес жауапкершілік көзделген.
«Бағаны негізсіз көтеру немесе дәрілік заттарды өткізу кезінде заңбұзушылықтар туралы DariKZ мобильді қосымшасы арқылы, сондай-ақ Медициналық және фармацевтикалық бақылау комитетінің өңірлік департаменттеріне жүгіну арқылы хабарлауға болады. Барлық өтініш заңнамада белгіленген тәртіппен қаралады», – деп мәлімдеді комитет өкілдері.
Сонымен қатар олар тұрғындарды тек ресми ақпарат көздеріне және тексерілген деректерге сүйенуге шақырады.