Қазақстанда ескі көліктерді утилизациялау бағдарламасы қайта іске қосылмақ
Қазақстанда автомобильдер мен ауыл шаруашылығы техникасына арналған утиль алымының жаңа мөлшерлемелері белгіленді.
Астана, NEGE. Ескі автомобильдерді кәдеге жарату бағдарламасын биыл қайта іске қосу жоспарланып отыр, деп жазады Inbusiness.kz.
Жеңілдік сертификатының мөлшері көлік құралының санатына қарай белгіленген.
M1 санатындағы жеңіл автомобильдерге 315 мың теңге мөлшерінде жеңілдік қарастырылған. M2 санатындағы жолаушылар көлігіне берілетін сертификат 550 мың теңге, ал M3 санатындағы ірі жолаушылар көлігіне 750 мың теңге болмақ.
N1 және N2 санатындағы жүк автомобильдеріне де 550 мың теңге мөлшерінде жеңілдік беріледі. Ал N3 санатындағы ауыр жүк көліктерінің иелері 750 мың теңгелік сертификат ала алады.
Осылайша, бағдарлама аясындағы жеңілдіктің ең жоғары мөлшері 750 мың теңге болады. Сертификаттарды ескі көлікті кәдеге жаратуға тапсырғаннан кейін жаңа автомобиль сатып алуға пайдалануға болады.