Қазақстанда электр энергиясы тарифтері тағы өзгеруі мүмкін
Энергетика министрлігі 60 энергия өндіруші ұйымның өтініші негізінде электр энергиясына шекті тарифтер бекітуді ұсынды.
Астана, NEGE. Бұйрық жобасы «Ашық НҚА» порталында жарияланды.
Құжат түсіндірмесінде тұрақты энергиямен жабдықтауды және генерациялаушы қуаттарды жаңғыртуды қамтамасыз ету мақсатында 60 энергия өндіруші ұйым үшін шекті тарифтер қайта қаралғаны жазылған.
«Шешім жөндеу науқандарын уақтылы өткізу, сондай-ақ жабдықтардың сенімділігін жаңарту мен ұстап тұру бойынша ұзақ мерзімді бағдарламаларды іске асыру үшін қажетті қаржылық жағдайларды жасауға бағытталған», – делінген түсіндірмеде.
Жаңа тарифтер 10 қыркүйектен бастап қолданысқа енгізілмек. Алайда шекті тарифтердің қаншалықты қымбаттайтыны және бұл өзгерістердің қай өңірлерге қатысты болатыны нақтыланбаған.
Бұл ретте бұйрық жобасын қабылдау теріс әлеуметтік-экономикалық салдарға әкеп соқтырмайтыны атап өтілген.