Қазақстанда биыл рекордты 825 мың тонна авиациялық отын өндірілмек
Энергетика министрлігі биыл 825 мың тонна авиациялық отын өндірілетінін хабарлады. Бұл жоспарланған 750 мың тоннадан 75 мың тоннаға артық.
Астана, NEGE. Ведомствоның ақпаратынша, былтыр 726 мың тонна авиаотын өндірілді. Биыл өткен жылмен салыстырғанда 13%-ға көп өнім өндірілмек.
«Алдағы уақытта өндіріс көлемін кезең-кезеңімен арттыру жоспарланып, 2031 жылға қарай оны 1,5 млн тоннаға дейін жеткізу көзделіп отыр», – делінген хабарламада.
Бұл ретте Қазақстанның азаматтық авиациясының, күштік құрылымдарының, азаматтық қорғау органдарының және мемлекеттік материалдық резервінің қажеттіліктері отандық авиациялық отын есебінен толық қамтамасыз етілетіні атап өтілген. Ал жолаушылар авиациясының ішкі жылдық қажеттілігі 680 мың тоннаны құрамақ.
Еске салсақ, бұған дейін Air Astana және FlyArystan компанияларына авиаотынға байланысты айыппұл салынғанын жазған едік. Тексеру кезінде екі ірі әуекомпанияның авиаотын көлемі бойынша бұрмаланған мәліметтер ұсынғаны анықталған.