Қазақстанда биыл мұнай экспорты 6,7%-ға төмендеген
2026 жылдың қаңтар-маусым айларында Қазақстан 33 млн тонна мұнай экспорттаған. Бұл өткен жылдың осы кезеңімен салыстырғанда 2,4 млн тоннаға немесе 6,7%-ға аз.
Астана, NEGE. Ranking.kz ақпаратынша, экспорттың ақшалай көлемі былтырғы 19,5 млрд доллардан 18,8 млрд долларға дейін төмендеген. Осыған қарамастан, бір тонна мұнайдың орташа есептік құны 550 доллардан 568 долларға дейін өскен.
Қазақстан мұнайын негізгі негізінен Италия, Нидерланд, Франция, Түркия және Грекия сатып алған. Экспортталған мұнайдың шамамен 71%-ы осы бес елге сатылған. Мұнайдан түскен экспорттық табыстың да 72%-ға жуығы осы елдерден келген.
Биыл қаңтар-маусым айларында Қазақстан мұнайын әдеттегідей Италия көбірек сатып алған. Бұл елге 6,8 млрд долларға 11,8 млн тонна мұнай экспортталған. Былтырмен салыстырғанда бұл елге 17,1 млн тонна мұнай кем тасымалданған, сәйкесінше түсім де 5 млрд долларға азайған.
Ал Нидерландқа биыл 2,5 млрд долларға 4,4 млн тонна, Франция 1,9 млрд долларға 3,2 млн тонна, Түркияға 1,3 млрд долларға 2,1 млн тонна, Грекия 1 млрд долларға 1,9 млн тонна мұнай экспортталған.
Қазақстан мұнайын ірі көлемде сатып алған басқа елдердің қатарында Сингапур (1,5 млн тонна), Румыния (1,4 млн тонна), Испания мен Қытай (әрқайсысы 1,2 млн тонна), сондай-ақ Германия (1 млн тонна) бар.
Қалған елдерге жалпы көлемі 3,4 млн тонна болатын мұнай экспортталған. Оның жалпы құны 1,9 млрд доллар болған.
Мұнай экспортының қысқаруын сарапшылар елдегі өндіріс көлемінің төмендеуімен де байланыстырады. Қаңтар-маусымда Қазақстанда 45,7 млн тонна мұнай өндірілген.