Қазақстанда 247 емшара кабинеті қызметін тоқтатты
Қазақстанда жеке процедуралық кабинеттердің иелеріне заңбұзушылықтар үшін 15 млн теңгеден астам айыппұл салынды.
Астана, NEGE. Денсаулық сақтау министрлігінің мәліметінше, бұзушылықтар жасаған немесе лицензияларға қажетті қосымшаларсыз жұмыс істеген 406 нысан анықталды. Түсіндіру жұмыстарын жүргізгеннен кейін 247 емшара кабинеті өз еркімен қызметін тоқтатты.
Емшара кабинеттері эпидемиологиялық маңызы жоғары нысандарға жатады және денсаулық сақтау субъектілеріне қойылатын талаптарға сәйкес болуға міндетті, - делінген хабарламада.
Қалған нысандарда тексеру жалғасуда. 84 емшара кабинетіне қатысты жоспардан тыс тексерулер аяқталды.
Тексеру барысында мынадай бұзушылықтар анықталған:
- медициналық қызметті лицензиясыз жүргізу;
- санитариялық ережелерді сақтамау;
- дәрілік заттарды дұрыс сақтамау;
- білікті медициналық персоналдың болмауы;
- шұғыл көмек көрсету үшін жиынтықтың болмауы.
Жұмыс қорытындысы бойынша 15 млн теңгеден астам сомаға 122 әкімшілік хаттама жасалды.
