Қазақстанда 2028 жылдан бастап ұл балаларға адам папилломасы вирусына қарсы екпе салына бастайды
Қазақстанда адам папиллома вирусына қарсы ұл балаларды вакцинациялау 2028 жылдан бастап профилактикалық егулердің ұлттық күнтізбесіне енгізілмек.
Астана, NEGE. Бұл жөнінде Санитариялық-эпидемиологиялық бақылау комитетінің баспасөз қызметі хабарлады.
Иммундау тегін медициналық көмектің кепілдік берілген көлемі аясында жүргізіледі.
Дәрігерлердің түсіндіруінше, вакцинация адам папилломасы вирусынан туындайтын кейбір аурулардың, соның ішінде жыныс мүшелеріндегі кондиломалардың, анус обыры мен жыныс мүшесі обырының алдын алуға көмектеседі. Сонымен қатар ұлдарды вакцинациялау вирустың таралуын азайту арқылы әйелдер үшін де жанама қорғаныс бола алады.
Айта кетейік, Қазақстанда биылдан бастап адам папилломасы вирусына қарсы екпе 14 жастан 18 жасқа дейінгі қыздарға да ерікті негізде салына бастайды. 13 мамырда бас мемлекеттік санитариялық дәрігер тиісті қаулыға қол қойды.
Ведомство мәліметінше, осы жылдың 1 мамырындағы жағдай бойынша 11–13 жастағы қыздарға адам папилломасы вирусына қарсы 398 мыңнан астам профилактикалық екпе егілген, оның ішінде 248 мыңына – бірінші доза, 150 мыңына екінші доза салынды. Вакцина алғандар арасында иммундаудан кейін кері әсерлер тіркелмеген.
