Қазақстан Украинада оқитын 200 үнділік студентті қабылдауы мүмкін
Денсаулық сақтау министрі Ажар Ғиният 200-ге жуық үндістандық студенттің Украинадан Қазақстанға ауысуы мүмкін екенін мәлімдеді. Айтуынша, Үндістан үкіметі Украинаның медициналық жоғары оқу орындарында білім алып жатқан студенттерін Қазақстанға көшіру туралы өтініш жасаған.
Нұр-Сұлтан, NEGE. “Үндістан үкіметі бізге ресми түрде өтініш жолдады. Кеше елімізге Үндістанның сыртқы істер министрі келді. Украинадағы 20 мыңнан астам үнді студенттері далада қалған, енді олар бізден көмек сұрап отыр. Негізі, біздің медициналық университеттеріміз көмектесуге дайын, шамамен 200 студентті қабылдай алады. Шетелдіктер оқу ақысын өздері төлейді", - деді ол.
Айта кетейік, студенттерді қазақстандық жоғары оқу орындарына ауыстыратын болса, олар ақылы негізде оқитын болады. Мүмкіндігінше оларға жатақхана беріледі.
