Қазақстан танкішілері дайындықтарын пысықтады
Қазақстандық әскерилер Армия халықаралық ойындарының «Танк биатлоны» конкурсына дайындық аясында Мәскеудің «Алабино» полигонында танкілердің қаруын тексеруден өткізді.
Алматы, NEGE. «Тәжірибелік оқ-атулар арқылы зеңбіректер мен пулеметтердің жарамдылығы, сондай-ақ олардан нысанаға тиімді соққы беру мүмкіндігі тексерілді. Экипаждар атыс кезінде шебер және үйлесімді әрекеттерін көрсетті. Сонымен қатар, жарыс ережелеріне сәйкес, қазақстандық әскерилер сайыс барысында техникамен өтетін трасса бағдарын зерттеді», - деді ҚР Қорғаныс министрлігінен. Оқ ату кезеңдеріне ерекше назар аударылған. Себебі ол сынақтардан сәтті өту көп жағдайда сайыс қорытындысына әсер етеді. «Бізді танкішілер аз уақыт ішінде бізге берілген техникаға техникалық қызмет көрсетуді сапалы орындады. Ал ату кезінде Отанымызда өткен қорытынды атулар кезіндегі көрсеткіштерден кем түспейтін нәтиже көрсетті. Бұл, команданың жеке жарысқа қатысуға деген ұмтылысы мен жоғары тұрғыдағы дайындығын білдіреді», - деді команда жаттықтырушысы полковник Анатолий Котвицкий. Армия халықаралық ойындарының ашылу салтанаты 23 тамызда өтеді және ҚР Қорғаныс министрлігінің YouTube-каналында тікелей эфир арқылы көрсетіледі (Нұр-Сұлтан қ. уақытымен сағаты 16.00-де басталады).