Қазақстан Уханьдағы азаматтарын елге алып келді
2 ақпанда Қытайдың Ухань қаласындағы 83 қазақ азаматы Отанына оралды. Бұл туралы Қазақстан Республикасы премьер-министрінің ресми ақпараттық ресурсы мәлім етті.
Алматы, NEGE. 83 азаматтың 80-і Ухань қаласында оқитын студенттер. Олардың жағдайын жол бойы денсаулық сақтау министрлігіне қарасты Ұлттық шұғыл медицина үйлестіру орталығының дәрігерлері бақылаған.
Алғашқы тексеруден соң елге оралған азаматтар Нұр-Сұлтан қаласынан 7 шақырым жердегі инфекцияға қарсы арнайы бөлінген корпусқа 14 күнге оқшаулауға жатқызылды.
Медициналық мекемеде Қытайдан келген азаматтар қосымша тексеруден, бірінші кезекте, коронавирустық инфекцияға тестілеуден өтеді.
Карантин кезеңінде елге оралғандар туыстарымен кездесе алмайды, тек аса қауіпті инфекциялармен жұмыс істеу тәжірибесі бар мамандармен ғана байланыста болады.