Қазақстан таеквондошылары АҚШ-та өтіп жатқан гран-при турнирінде екі қола медаль жеңіп алды
АҚШ-тың Шарлотт қаласында 2025 жылғы Grand Prix Challenge сериясының алғашқы кезеңі өтіп жатыр.
Алматы, NEGE. Турнирдің екінші күні Қазақстан құрамасы екі қола медаль жеңіп алды.
Жүлделі үшінші орынға Тамерлан Тілеулес (58 келіге дейін) пен Батырхан Төлеуғали (80 келіге дейін) көтерілді.
Бұл Тамерлан үшін World Taekwondo турнирлеріндегі алғашқы жүлдесі. Әсіресе оның қола медаль үшін өткен кездесудегі жеңісі айрықша атап өтуге тұрарлық. Қазақстандық спортшы Олимпиада чемпионы, италиялық Вито Делль’Акуиланы 2:0 есебімен ұтты.
80 келіге дейінгі салмақтағы құраманың көшбасшысы Батырхан Төлеуғали турнирлік кестеде сенімді өнер көрсетіп, қола медаль үшін жекпе-жекте Чили спортшысы Хоакин Черчиллмен кездесті.
Бірінші раунд тең дәрежеде өтті. Алайда, екінші раундта Батырхан айқын басымдық танытып, жеңіске жетті.
Жүлделі орындардан бөлек, қазақстандық таеквондошылар 2026 жылы Италияның Рим қаласында өтетін келесі Гран-при сериясына жолдама алады.
Айта кетейік, Шарлотттағы жарыс - Дүниежүзілік таеквондо федерациясының ұйымдастыруымен өтіп жатқан 2025 жылғы Grand Prix Challenge сериясының алғашқы кезеңі. Турнирге 44 елден 376 спортшы қатысты.
