Қазақстан – Ресей шоколадын ең көп алатын ел

Алматы, NEGE. Comtrade платформасының мәліметінше, қаңтар мен сәуір аралығында Ресей Қазақстанға жалпы құны 78,3 миллион доллар болатын шоколад өнімдерін жеткізген. Екінші орында — Әзербайжан (23,4 млн доллар), одан кейін Өзбекстан (21,4 млн), Қырғызстан (14,7 млн) және Грузия (8 млн доллар) тұр.

Айта кетейік, бұрын Беларусь те ресейлік шоколадтың негізгі импорттаушылары қатарында болған. Алайда 2022 жылдан бастап бұл ел мұндай мәліметтерді жариялауды тоқтатқан.

Еске салайық, биыл көктемде Қазақстанда шоколад өнімдерін өндіру көлемі едәуір төмендегені хабарланған еді. Сонымен қатар бұл өнімнің бағасы тұрақты түрде өсіп келеді.

Ал Ұлттық статистика бюросының ресми деректері бойынша, азық-түліктің көп түрі бойынша өз өндірісіміз 1990 жылғы деңгейге әлі де жете алмай отыр. Мұның ішінде шоколад та бар.

1990 жылы елімізде 258,8 мың тонна шоколад және шоколадтан жасалған кондитерлік өнім шығарылса, 2024 жылы бұл көрсеткіш 92,4 мың тоннаға дейін төмендеген.