Қазақстан мен Өзбекстан арасындағы әуе рейстері аптасына 42-ге дейін артады
Қазақстан мен Өзбекстан азаматтық авиация саласындағы ынтымақтастықты кеңейту және рейстер санын көбейту жөнінде келісімге келді. Бұл туралы ҚР Азаматтық авиация комитеті хабарлады.
АЛМАТЫ, NEGE. Келісім Орталық Азия – Қытай (С5+1) форматындағы азаматтық авиация бойынша жұмыс тобының конференциясы аясында жүргізілген келіссөздерде қабылданды.
Жаңа келісімге сәйкес, екі елдің тағайындалған әуе компанияларына Алматы – Ташкент және Астана – Ташкент бағыттарында аптасына 42 рейске дейін орындауға рұқсат берілді. Ал басқа бағыттар бойынша аптасына 14 рейске дейін ұшуға мүмкіндік жасалды. Сондай-ақ, қос тарап тұрақты рейстерді орындайтын қосымша әуежайларды белгілеуге уағдаласты.
Айта кетейік, Қазақстан мен Өзбекстан арасындағы авиация саласындағы әріптестік қарқынды дамып келеді. Мәселен, 2025 жылғы 3 шілдеден бастап Өзбекстанның My Freighter (Centrum Air) әуе компаниясы Ақтау – Нукус бағыты бойынша аптасына 2 рейс орындай бастады. Ал 15 шілдеден бастап Fly Arystan Атырау – Ташкент бағытына аптасына 3 рейс ашты.
Келіссөздер қорытындысында тараптар ынтымақтастықты жалғастырып, жаңа бастамаларды бірлесіп жүзеге асыруға дайын екенін растады.