Қазақстан мен Армения көші-қон саласындағы ынтымақтастық жөнінде келісімге келді
Мәжіліс 2024 жылғы 15 сәуірде Ереван қаласында жасалған Қазақстан мен Армения үкіметтері арасындағы көші-қон саласындағы ынтымақтастық туралы келісімді ратификациялады.
Алматы, NEGE. Ол көші-қон саласындағы екі елдің құзырлы органдары арасындағы қарым-қатынасты реттеуге және екіжақты ынтымақтастықты нығайтуға бағытталған.
Қазақстан тарапынан құзырлы органдар – Ішкі істер министрлігі мен Еңбек және халықты әлеуметтік қорғау министрлігі, Армения жағынан – Полиция және Ішкі істер министрлігінің Көші-қон және азаматтық қызметі болады.
Келісім аясында тараптар статистикалық, құқықтық және ғылыми-әдістемелік ақпаратпен, тараптардың аумақтарында орналасқан мемлекеттердің азаматтары туралы мәліметтермен алмасуға, сондай-ақ тараптардың аумағында азаматтардың болуына қатысты құқықтық мәселелерін қарастыруға және ынтымақтастық процесінде туындайтын мәселелер бойынша көмек көрсетуге келісті.
Бұл ақпарат елдерге қос азаматтықпен күресу және заңсыз көші-қон арналарының жолын кесу үшін қажет.
