Қазақстан мен АҚШ тарабы Каспий құбыр консорциумына қатысты жағдайды талқылады
Қазақстанның сыртқы істер министрі Ермек Көшербаев АҚШ-тың мемлекеттік хатшысы Марко Рубиомен телефон арқылы сөйлесті.
Астана, NEGE. Қазақстан Сыртқы істер министрлігінің хабарлауынша, келіссөз барысында негізгі тақырыптың бірі Каспий құбыр консорциумына қатысты жағдай болған. Ведомство өкілдері қос тараптың нақты қандай шешімге келгенін жариялаған жоқ.
Сондай-ақ екі елдің ресми өкілдері кеңейтілген стратегиялық серіктестік шеңберіндегі екіжақты күн тәртібінің өзекті мәселелерін, сондай-ақ Мемлекет басшысы Қасым-Жомарт Тоқаевтың G20 саммитіне қатысуына орай АҚШ-қа жоспарланған сапарына дайындық барысын талқылаған.
Айта кетейік, соңғы айларда Каспий құбыр консорциумы инфрақұрылымына бірнеше рет дронмен шабуыл жасалды.
Консорциум Қазақстан мұнайын экспорттаудың негізгі бағыты болып саналады. Елдің жалпы мұнай экспортының шамамен 80%-ы осы құбыр арқылы тасымалданады.
Сонымен қатар бұл құбырмен тасымалданатын мұнайды өндіруге Chevron мен ExxonMobil сынды ірі америкалық компаниялар қатысады.
Chevron «Теңізшевройл» компаниясының 50%-ына иелік етеді. ExxonMobil компаниясы да оның акционерлерінің бірі. Екі компания да Қашаған кен орнын игеру жобасына қатысады.
Сондықтан Каспий құбыр консорциумы жұмысындағы кез келген іркіліс мұнай экспортына, өндіру көлеміне және америкалық инвесторлардың табысына тікелей әсер етеді.