Қазақстан мектептерінде метапневмовирусқа байланысты шектеулер енгізіле ме?

Алматы, NEGE. Оқу-ағарту министрі Ғани Бейсембаев аталмыш сауалға жауап берді.

«Еліміздің білім беру жүйесі түрлі сынақтарға төтеп бере алатынын көрсетті. Бұл 2020 жылғы пандемия кезінде жинақталған тәжірибенің нәтижесі. Осыған орай, колледждер мен мектептер қажетті жабдықтармен толықтай қамтамасыз етілген. Дегенмен, қазіргі жағдайға байланысты Денсаулық сақтау министрлігінің шешімін күту қажет», – деді министр.

Премьер-министрдің орынбасары Тамара Дүйсенованың айтуынша, Қазақстан Денсаулық сақтау министрлігінің ұстанымы Дүниежүзілік денсаулық сақтау ұйымы жауабына негізделеді.

«Жақында денсаулық сақтау министрлігі осы мәселеге қатысты жауабын берді. Министрлік ДДСҰ-ға сауал жолдаған. Ұйым бізге ғана емес, басқа да елдерге жауап берген. Ұйымдағылардың айтуынша, бұл вирус ондаған жылдар бойы таралып келе жатқандықтан, қатты үркудің қажеті жоқ, бірақ аурудың алдын алу шараларын ұмытпаған жөн. Біз де осы жауапқа сүйенеміз. Сол себепті вирустың кең таралу кезеңін бірге өткеруіміз керек», – дейді премьердің орынбасары.