Қазақстан көмір саласына инвестиция көлемін екі есе арттырмақ
Энергетика министрлігінің мәліметінше, биыл көмір өнеркәсібіне 553 миллиард теңге инвестиция тарту жоспарланған. Бұл 2025 жылы салынған инвестиция көлемінен екі еседей көп.
Астана, NEGE. Өткен жылдың қорытындысы бойынша Қазақстанда көмір өндіру көлемі 115 млн тоннаға жетті. Бұл 2024 жылмен салыстырғанда 7%-ға көп. Оның ішінде 85 млн тонна көмір ішкі тұтыну мен коммуналдық-тұрмыстық қажеттіліктерге жұмсалса, экспорт көлемі 30 млн тонна болды. Қазақстан көмірі негізінен Ресей, Польша, Өзбекстан, Түркия, Үндістан, Малайзия елдеріне экспортталды.
«2026 жылы көмір өндіру көлемін 128,9 млн тонна деңгейіне жеткізу жоспарланып отыр. Қазір көмір өндірумен 40 жер қойнауын пайдаланушы айналысады.
Геологиялық барлау жұмыстарын дамытуға ерекше назар аударылуда. Биылғы жылдың соңына дейін 10 жер қойнауы учаскесі бойынша көмір кен орындарына жер қойнауын пайдалану құқықтарын беру жөнінде аукцион өткізу жоспарланған», – делінген министрлік хабарламасында.
Қазақстан көмір қоры бойынша әлемде 10-орынды иеленеді. Жалпы көмір қоры 33,6 млрд тоннаға тең. Бұл қор елді 300 жылдан астам уақытқа көмірмен қамтамасыз етуге жетеді.