Қазақстан халқының саны 20,4 миллионнан асты
Биыл қаңтар мен шілде аралығында Қазақстанда халық саны 124,5 мыңға (0,61%) көбейген. Ұлттық статистика бюросының мәліметінше, 1 тамызға қарай елде халық саны 20 407 844 жетті.
Алматы, NEGE. Бюро мәліметінше, биыл халық санының өсімі алдыңғы жылдармен салыстырғанда баяулау.
12,9 млн адамы – қалада, 7,4 млн ауылда тұрады. Халық ең көп шоғырланған аймақтарға: Алматы қаласы (2,2 млн), Түркістан облысы (2,1 млн), Астана қаласы (1,5 млн), Алматы облысы (1,5 млн), Алматы облысы (1,5 млн), Шымкент қаласы (1,2 млн), Жамбыл облысы (1,2 млн) Қарағанды (1,1 млн) облысы жатады.
Алғашқы жеті айда орташа республикалық деңгейден жоғары өсім тек бес аймақта байқалған: Астана, Шымкент, Алматы, Алматы және Маңғыстау облыстары. Ақтөбе, Атырау, Ақмола, Қызылорда облыстарында орташа республикалық деңгейден төмен өсім болған. Қалған аймақтарда халық санының азаюы сезіледі. Алғашқы алты айда мұндай құбылыс әсіресе Солтүстік Қазақстан, Абай және Ұлытау облыстарында байқалған.
Солтүстік Қазақстан мен Шығыс Қазақстан облыстарында халықтың табиғи азаюы байқалған: мұнда өлім көрсеткіші туу көрсеткішінен асып түсті. Қалған аймақтарда халықтың табиғи өсімі байқалды.