Қазақ тілін тереңдетіп оқытатын мектеп енді болмайды
Республикалық қазақ тілі мен әдебиетін тереңдете оқытатын мектеп-интернатына "лингвистикалық" деген атау беріп, "қазақ тілі мен әдебиеті" сөздерін алып тастамақ. Бұл туралы осы мектепте ұзақ жыл еңбек еткен ұстаз Дамеш Исаханова Фейсбукте хабарлады.
Алматы, NEGE. «Бұл хабарды естіп, күйзеліп отырмын. Осыдан 32 жыл бұрын республикалық мәртебесінен айырылып, орыс-қазақ аралас мектепке айнала жаздаған сәтте "Қазақ әдебиеті" газетіне мен хат жазып, қол жинадым. Шерхан Мұртаза, Өзбекәлі Жәнібеков сынды азаматтардың араласуымен Қазақ тілі мен әдебиетін тереңдете оқытатын республикалық мектеп-интернат болып қайта құрылып еді. Енді осы білім ордасына тағы да қауіп төнген іспетті», – дейді Дамеш Исаханова.
Оның пікірінше, «лингвистикалық» деген атау беру қазақ тілінің мәртебесін түсіру, басқа тілдермен қатар қою. «Кезінде мектептің жерін тартып алып, басқа ғимаратқа көшіргенде, бір арнаға берген сұхбатымда "осы мектептің тағдыры қазақ тілінің тағдырымен бірдей» деп ашынып едім, тағы да солай болайын деп тұр-ау», – деп күдіктенеді ұстаз.
Айта кететін жайт, бұл мектептің түлектері арасында көрнекті дипломаттар, танымал әншілер, ақындар мен журналистер көп шыққан. Мәселен, әншілер Тоқтар Серіков, Ақбота Керімбекова, Тамара Асар, ақын Танакөз Ілиясова, Қазақстанның БАӘ-дегі елшісі Мадияр Меңілбеков, тағысын тағылар.
