Қазақ күресінен әскерилер арасындағы алғашқы әлем чемпионатында Қазақстан құрамасы топ жарды
Елордада 14–15 тамыз күндері Халықаралық әскери спорт кеңесінің (CISM) қолдауымен қазақ күресінен әскерилер арасындағы тұңғыш әлем чемпионаты өтті. Жарыс Qazaqstan жеңіл атлетикалық кешенінде ұйымдастырылды.
Алматы, NEGE. Турнир қорытындысы бойынша Қазақстан құрамасы жалпыкомандалық есепте бірінші орын иеленді. Екінші орынға Өзбекстан құрамасы, үшінші орынға Ресей командасы жайғасты.
Қазақстан спортшылары 8 алтын, 6 күміс және 2 қола медаль жеңіп алып, сенсациялық нәтижеге қол жеткізді.
CISM президенті, полковник Ролим Фильо Нилтон Гомес жарыстың жоғары деңгейде өткенін атап өтіп, қатысушылардың дайындығына жоғары баға берді.
Ерлер арасындағы чемпиондар қатарында қазақстандықтар Бекжан Төлепов (55 кг), Ернұр Сүлеймен (60 кг), Сағындық Әшім (66 кг), Жұмажан Қожамбеков (74 кг), Ғалымжан Қырықбай (+100 кг) бар. Әйелдер арасында Айжан Жылқыбаева (48 кг), Рауза Нұрмұхаметова (56 кг) және Ақерке Рамазанова (+77 кг) жеңімпаз атанды.
Айта кетейік, биыл күшіне енген «Дене шынықтыру және спорт туралы» заң аясында қазақ күресі ресми түрде басым спорт түрлерінің қатарына енгізілді. Бұл ұлттық спорттың жаңа деңгейде дамуына жол ашады.
