Қазақ қызы Дональд Трампты ұлықтау рәсіміне шақырту алды
Қазақстандық саясаттанушы, CDF қоғамдық қорының негізін қалаушы Дина Шайхислам АҚШ-тың жаңадан сайланған президенті Дональд Трамптың инаугурациясына жеке шақырту алды. Бұл туралы ол әлеуметтік желідегі парақшасында хабарлады.
Алматы, NEGE. Ұлықтау рәсімі 20 қаңтар күні Вашингтонда өтеді. Ол АҚШ Конгресінен келген жеке шақыртудың бейнежазбасын жариялады.
Видеодан шақырудың құрамына инаугурацияға кіру билеті, қосымша шақырту хаттары, Дональд Трамп пен жаңа вице-президент Джей Ди Вэнстің қолтаңбасы бар фотосуреттер, инаугурация бағдарламасы кіретінін көруге болады.
«Бүгін мен президент Трамп пен вице-президент Вэнстің инаугурациясына ресми шақырту алдым», – деп жазды ол.
Дональд Трамптың АҚШ-тың 47-президенті ретінде инаугурациясы 2025 жылдың 20 қаңтарында Вашингтонда, жергілікті уақытпен сағат 12.00-де өтеді. Сонымен қатар рәсім барысында Джей Ди Вэнс вице-президент ретінде ант береді.